რა არის ურანული ასტროლოგია

თუ ფიქრობთ, რომ თქვენი ნატალური რუკა აბსოლუტურად ზუსტი იყო, მაშინ ურანული ასტროლოგიის შესახებ ჯერ არაფერი გსმენიათ, რომელიც გაცილებით უფრო კონკრეტული და ლაკონურია.

გერმანელმა ასტროლოგებმა, ფრიდრიხ ზიგგრუნმა (Friedrich Sieggrün) და ალფრედ ვიტემ (Alfred Witte), ურანული ასტროლოგია 1930-იან წლებში (და ზოგადად მე-20 საუკუნის პირველ ნახევარში) განავითარეს, როგორც კოსმოსის ინტერპრეტაციის სრულიად ახალი გზა. მათ ნამდვილი რევოლუცია მოახდინეს ასტროლოგიურ სამყაროში საკუთარი თავისა და გარესამყაროს შესაცნობად განსხვავებული მოდელის შეთავაზებით.

ჰიზერ როან რობინსი (Heather Roan Robbins), აღიარებული ასტროლოგი და წიგნის „Starcodes Astro Pocket Oracle: A 56-Card Deck and Guidebook“ (და სხვა არაერთი შესანიშნავი ნაშრომის) ავტორი, განმარტავს, რომ ურანული სისტემა ასტროლოგიურ აზროვნებაში პლუტონის აღმოჩენის შემდეგ დაწყებული გარდატეხის შედეგად ჩამოყალიბდა. რობინსი დასძენს, რომ ურანული ასტროლოგია იყენებს ენერგეტიკულ წერტილებს, რომლებიც მოქმედების კატალიზატორებად გვევლინებიან.

მაინც რა განსაკუთრებულ ინფორმაციას გვაწვდის ურანული ასტროლოგია ჩვენ შესახებ და რით განსხვავდება იგი ტრადიციული ასტროლოგიისგან? წაიკითხეთ სტატია დეტალების გასაგებად.

რით განსხვავდება ურანული ასტროლოგია ტრადიციულისგან?

მთავარი ფაქტორი, რაც ურანულ ასტროლოგიას ტრადიციულისგან ასხვავებს, მე-10 სახლის ანუ Midheaven-ის (ზეცის შუახაზი, MC) განლაგება და ინტერპრეტაციაა, რომელსაც ამ მეთოდში მერიდიანს (Meridian) უწოდებენ.

დასავლური ასტროლოგიის მიხედვით, მე-10 სახლი წარმოადგენს ჩვენს კარიერასა და საზოგადოებრივ სტატუსს, თუმცა ურანულ ასტროლოგიაში ის გამოიყენება როგორც ადგილი, სადაც ჩვენი სულის მიზანს ვპოულობთ: აქ აქცენტი კეთდება ინდივიდზე და არა მის საჯარო პერსონაზე. ნაცვლად იმისა, რომ ეს სახლი ფოკუსირებული იყოს იმაზე, თუ რას გავცემთ სამყაროში, ის კონცენტრირდება იმაზე, თუ რა შემოგვაქვს საკუთარ თავში.

კიდევ ერთი განსხვავება ისაა, რომ ურანული ასტროლოგიის არსი ენერგიაა და არა ფიზიკური სივრცეები ან ადგილები, რომლებსაც პლანეტები ფლობენ, თუმცა მათ გამოყენებაზე უარს მაინც არ ვამბობთ. ჩვენ ვიყენებთ სისტემას, რომელიც ეფუძნება ძალის წერტილებს, რომლებსაც ტრანსნეპტუნური პლანეტები ეწოდება. მათგან ორი მთავარია ჰადესი (Hades) და კუპიდონი (Cupido). დანარჩენებია: ზევსი (Zeus), კრონოსი (Kronos), აპოლონი (Apollon), ადმეტოსი (Admetos), ვულკანუსი (Vulcanus) და პოსეიდონი (Poseidon). ისინი აჩვენებენ ჰიპერ-სპეციფიკურ შაბლონებს, რომლებიც გავლენას ახდენენ ჩვენზე და ჩვენს ემოციურ რეაქციებზე.

რობინსი აღნიშნავს, რომ ურანული ასტროლოგია შესანიშნავი ინსტრუმენტია საკუთარ რუკაში უფრო ღრმად ჩასახედად. იგი მას იყენებს იმის გასაგებად, თუ რატომ აქვთ მის კლიენტებს განსაკუთრებული პიროვნული თვისებები, მოტივაციები და მგრძნობელობა, რაც მხოლოდ ნატალური რუკის დათვალიერებით არ ჩანს. რობინსი მიმართავს შუაწერტილებს (მიდპოინტებს), როდესაც კლიენტის გაგებისას ნატალურ რუკაში რაღაც „აკლია“, რაც მოვლენათა ჯაჭვს იწვევს. შესაბამისად, ისინი საუკეთესო საშუალებაა დეტალებში გასარკვევად და ფარული ნიუანსების აღმოსაჩენად.

რას ნიშნავს ზოდიაქოს ნიშნები ურანულ ასტროლოგიაში?

ნიშნების მნიშვნელობა იგივე რჩება, თუნდაც ისინი შუაწერტილების სახით გვევლინებოდნენ. ქალწულის ნიშნის მე-7 გრადუსზე მყოფი მზისა და მთვარის შუაწერტილს ზუსტად ისეთივე ძალა აქვს, როგორიც ტრადიციულ ასტროლოგიაში. თუმცა, მან შეიძლება ბიძგი მისცეს კონკრეტულ მოვლენას, კავშირს ან ემოციურ მდგომარეობას.

შეგვიძლია ვთქვათ, რომ მზისა და მთვარის შუაწერტილი ააქტიურებს ჩვენს ემოციურ სურვილებსა და სიღრმეებს ქალწულის თვისებებით. ეს ნიშნავს, რომ ადამიანი შესაძლოა იყოს ზედმეტად მოაზროვნე (Overthinker), პერფექციონისტი, კარგი მსმენელი და პრაქტიკული თავის გრძნობებში.

იგება თუ არა ნატალური რუკა ურანულ ასტროლოგიაში?

ნატალური რუკის აგების ნაცვლად, ურანული ასტროლოგია მოითხოვს შუაწერტილების ხის (Midpoint tree) გამოყენებას (ეს ურანული ასტროლოგიის შესწავლის დაწყების ყველაზე მარტივი გზაა). მას მაინც სჭირდება თქვენი დაბადების დღე, წელი, დრო და ადგილი: ზუსტად ის მონაცემები, რომლებსაც ნატალური რუკისთვის იყენებთ.

სპეციალურ კალკულატორებს შეუძლიათ ამ შუაწერტილების ხის შექმნა. დიახ, თქვენ ასევე შეგიძლიათ ააგოთ ჰარმონიკული რუკა (Harmonic chart), რომელიც იქმნება ნატალური რუკის კონკრეტულ რიცხვზე გაყოფით და ახალი რუკის აგებით პლანეტების ამ ახალი დაყოფით მიღებული პოზიციების მიხედვით. დამწყებთათვის ყველაზე მარტივია შუაწერტილების ხის გამოყენება საკუთარ ნატალურ რუკაზე.

რას ნიშნავს პლანეტები ურანულ ასტროლოგიაში?

ურანული ასტროლოგია ფოკუსირებულია შუაწერტილების გამოყენებაზე და არა ტრადიციულ სახლებზე ნატალურ რუკაში. შუაწერტილები ორ პლანეტას შორის არსებული შუა გრადუსებია. ისინი მოქმედებენ როგორც ტრიგერები და კატალიზატორები ემოციების, ცვლილებებისა და ზრდისთვის.

შუაწერტილების შესწავლა დაგეხმარებათ გაიგოთ, რატომ გაქვთ კონკრეტული რეაქცია რომელიმე ადამიანზე ან სიტუაციაზე. მაგალითად, თუ თქვენი ტყუპების მზის (ჩვენი ეგო) მე-7 გრადუსისა და მშვილდოსნის მთვარის (ჩვენი გრძნობები) მე-7 გრადუსის შუაწერტილი ქალწულის მე-7 გრადუსზე მოდის, ეს შეიძლება ნიშნავდეს, რომ ადამიანები, რომელთა პლანეტებიც ამ შუაწერტილის 1 გრადუსის ორბის ფარგლებში ხვდებიან (წინ ან უკან), თქვენთვის დამამშვიდებელნი და კომფორტულნი არიან.

მზის ნიშნის მიღმა, ჩვენ შეგვიძლია ეს შუაწერტილი მივუსადაგოთ ნებისმიერ პლანეტას, რომელიც 1 გრადუსის ორბის ფარგლებში ხვდება. ასე მაგალითად, თუ დედათქვენის მერკური (კომუნიკაციის პლანეტა) უერთდება ამ შუაწერტილს, თქვენ მასთან, შესაძლოა, ყოველდღე გქონდეთ კომუნიკაცია.

დავუშვათ, თქვენი პარტნიორის იუპიტერი (რომელიც გაფართოებასა და ზრდას განასახიერებს) უკავშირდება ამ ნიშანსა და გრადუსს: მას შეიძლება სურდეს თქვენზე ზრუნვა და თქვენთან ერთად საერთო სახლის შექმნა. მაგრამ თუ მათი პლუტონის ნიშანი და გრადუსი (პლუტონი მოულოდნელი ცვლილებების მომტანი პლანეტაა) უსწორდება ამ შუაწერტილს, ურთიერთობა შეიძლება დესტრუქციული იყოს, თუმცა დაგეხმარებათ გარდაიქმნათ იმ ადამიანად, ვინც უნდა ყოფილიყავით.

როდესაც საქმე ეხება მოვლენების დაგეგმვას, შუაწერტილებმა შეიძლება მიგვითითოს ქორწინების იდეალურ თარიღზე ან პირველი პაემნის საუკეთესო მომენტზე. ვარსკვლავების ტრანზიტების დაკვირვება შუაწერტილებთან მიმართებაში ასევე გვაძლევს საშუალებას ზუსტად გავაანალიზოთ ადამიანის განწყობილებები.

ვინაიდან ვენერა და იუპიტერი ბენეფიკები (კეთილისმყოფელი პლანეტები) არიან, მათ იღბალი მოაქვთ სიყვარულში, მეგობრობასა და ფინანსებში. მზეს თამაშში შემოჰყავს ჩვენი ცხოვრებისეული მიზნები, ხოლო მთვარე აძლიერებს ჩვენს ემოციურ მდგომარეობას.

პლანეტარული შუაწერტილების კომბინაციები, რომლებიც ყველაზე პოზიტიურ ენერგიას გამოიმუშავებენ სიყვარულისთვის, ფულისთვისა და ბედნიერებისთვის, შემდეგია:

• ვენერა და მზე
• ვენერა და მთვარე
• ვენერა და იუპიტერი
• მზე და იუპიტერი
• მზე და მთვარე
• მთვარე და იუპიტერი

გაითვალისწინეთ, რომ ყველა შუაწერტილს არ მოაქვს ცისარტყელები და პეპლები. „ჯოჯოხეთის წერტილი“ (hell point) არის ძალიან ინტენსიური შუაწერტილი სატურნსა და პლუტონს შორის. ვინაიდან სატურნი ზღუდავს და თრგუნავს, ხოლო პლუტონი ტრანსფორმაციას ახდენს და აკვიატებებს ბადებს, ამ პლანეტებმა შეიძლება კონტროლის მძიმე ატმოსფერო შექმნან.

თუ ეს შუაწერტილი აქტიურდება რომელიმე ასტროლოგიური მოვლენით, ის ადამიანს ღრმა დეპრესიულ მდგომარეობაში აგდებს. ხოლო როდესაც ის სხვა ადამიანის რუკით აქტიურდება, ორ ადამიანს შორის ქმნის ტოქსიკურ ურთიერთობას, რომელიც ეჭვიანობითა და წყენით საზრდოობს. ფაქტობრივად, გრძნობთ თავს ისე, თითქოს ჯოჯოხეთში ხართ. ამ შუაწერტილის სახელი ნამდვილად არ ცრუობს.